انا سكران

أنا سكران ع خمر الدوالي وع كاسة عرق من ريق الصبايا
بحب السهر ع جفون الليالي وعاكحل رموش في عيون الولايا
تا إصحى وفيق وتوعّى ع حالي وشوف العمر قرّب ع النهاية
ثنيت الكاس وشربت التوالي وصبغت الغزل ع صدرا عبايا
جمعت زهور من حبكة خيالي وعلى النهدين حطّيتن ملايا
حلت في عيونها قللها تعالي فكفكي زرار ع كنوز الخفايا
خوابي الخمر عم بتصيح مالي دخيلك قوم واكشف هالخبايا
دوالي قطوفها فوق العلالي وعصير الخمر جوّات الثنايا
ذبت ع صوتها بعدو في بالي بيدغدغ في ضلوعي والحنايا
رقص من فرحته قلبي ونادالي يا شايب فيق لا تزيد الخطايا
زمان الشيب ع شعري غزا لي وفي قلبي شبّ لو ضعفوا الخلايا
سوالف بيض بصبغها لحالي بعتم الليل وبشدّ العرايا
شباب بظلّ في قلبي وخيالي ما بهمَل همّ في دنيا البلايا
صبايا عاليمين وعاشمالي ع قلبي دوم طلّتهن سنايا
ضفاير سود ونجوم ولآلي عطور الورد ع شفافن طرايا
طعمها شهد وبذوقو حلا لي وعاوقع القُبل بتزوغ النوايا
ظلال رموشها وهيّ قبالي بلون الكحل ع حفاف الزوايا
عنقها عاج وبلونه بدا لي آيات الحسن ع كتافا مرايا
غصن رمان لوّح بالعلالي ثقل ع كواز ع حفاف الملايا
في لحظة صحت شيلي هالغلالة ما فيكي تحشريهن يا منايا
قالتلي صبور ما بفكّ الغوالي زغاليلي زغار ع طيور البرايا
كنت سكران قلتلها تعالي ما فينا نعيش خليكي معايا
لوت في شفافها وقالت شو مالي يا شايب ليش تخّنت الحكايا
ما فيّي فرّط بحسني وجمالي على ختيار شاطر في العطايا
نسيت السكر وبحور الثمالة ع قولها وجيت إنهي هالرواية
هواهن نار تقطفلي ذيالي تا إصحى وعود لوعيّ الهداية
وإذا تغزلت في السمر العوالي و عاحبّ الشقر هفّيت بهوايا
يمين بقول ما بضمن عاحالي ما دام القلب دقاتو قوايا