القهوة

القهوة

بنت اليمن ع النار تتقلّى وعم تستوي تا تعمر الدلاّت
ع حفّة المحماس تتجلّى ويسمرّ لونا وتصبغ الوجنات
وتفوح ريحة بنّها احلى من خمرة عناقيد والكرمات
ع دقّة المهباج تتسلّى بالحان عم تصدر مع الدقّات
وفي أربع معاميل تتهلّى أوّل خميرة ع هدى الجمرات
ومن بعد منّها تروق ع مهلا عنشان تصفى وتجهز القهوات
آخر مصب يكون في المغلى ريق الحبيب يكون في كاسات
أوّل شرط فنجان لا تملى للضيف صبّه بنقر ع الحفّات
بإيد اليمين تقدّمه أولى في كلّ مرّة يخلصو الهزّات
وان كان ضيفك ما شرب إلاّ عنده طلب مرهون بالنيات
بتقول ضيفي قهوتك تحلى ومقدّمة لعيونك الدمّات
وان كان شفت الطلب عم يعلا ما فيك قدرة والامر فوّات
تعتذر للضيف وتقللّه هلا أهلا وسهلا قصروا الديّات
سلطان قام بثورته وخلاّ دولة فرنسا تزيد في القوات
لما ع بيته العسكر إستولى ساق الطنيب وما رعى الحرمات
ثار الدروز وما حدا إتخلى عن واجبه واتسابقوا ع الموت
تا يحفظوا ع الوطن والعادات